कमल थापालाई झट्का : बोहरा आए चन्दसहित दर्जनले छोडे

१२ फागुन, हेटौँडा । राप्रपाका अध्यक्ष कमल थापालाई ठूलो झट्का लागेको छ । पार्टी एकिकरणको प्रयास असफल भएपछि देशभर आन्दोलन चर्काउने तयारीमा जुटेका बेला उनलाई ठूलो झट्का लागेको हो । 
राप्रपाका पुराना नेता एवं पूर्वमन्त्री दिपक बोहोरा राप्रपामा प्रवेश गरेकै दिन राप्रपाका नेता एवं पूर्वमन्त्री जयन्तबहादुर चन्दसहित एक दर्जन नेताले कमल थापालाई छोडेका छन् । चन्दले एक दर्जन नेता लिएर पार्टी परित्याग गरेको समाचार बाहिरिएको छ । चन्दैसंगै भरत पाठक, भरत गिरि, प्रल्हाद साह, दिनेश श्रेष्ठ, गोविन्द खनियाँ, सानुकाजी हेक्का, चिरागमानसिँह कुँवर, रिता पोखरेल, सुन्दर खड्का, गणेशबहादुर बिष्ट, गजेन्द्रबहादुर सिँह, बिन्दा गिरि, भरतबहादुर चन्द, गोपाल दाहाल, गणेश चन्द, मुकुन्द कार्की र पूर्ण चौलागाईंले राप्रपा परित्याग गरेको खबर अनलाईन खबरले बनाएको छ ।
पार्टी परित्याग गरेका उनीहरु केही दिनमा राप्रपा संयुक्तमा प्रवेशको तयारीमा रहेको राप्रपा स्रोतले जनाएको छ । तर बोहेरालाई पार्टी प्रवेश गराउने क्रममा राप्रपा अध्यक्ष थापाले पार्टी एकिकरणका लागि ढिलाई नगर्न राप्रपा संयुक्तका अध्यक्ष पशुपतिशम्शेर राणा र प्रकाशचन्द्र लोहनीलाई आग्रह गरिरहेका थिए । एकजनालाई पार्टी प्रवेश गराउँदा दर्जन नेताले पार्टी छोड्दा राप्रपालाई नोक्सानी पुगेको नेताहरुले बताएका छन् ।