राष्ट्रिय म्याराथनमा आर्मीका खत्री प्रथम

२ मंसिर, हेटौँडा । सुमन भोजन स्मृति खेलकुद प्रतिष्ठानको आयोजनामा हेटौँडामा बिहिबार सम्पन्न राष्ट्रिय म्याराथन दौड प्रतियोगितामा नेपाल आर्मीका राजन खत्री पहिलो भएका छन् ।मकवानपुर एथ्लेटिक्स संघको व्यवस्थापनमा भएको दौडमा २ सय ५० जनालाई पछि पार्दै खत्री पहिलो भएका हुन् ।
खत्रीले २ घण्टा ३१ मिनेट ४२ सेकेण्डमा आफ्नो दौड पुरा गरेका थिए । प्रतियोगितामा आर्मीकै नवराज साउनले २ घण्टा ३४ मिनेट १२ सेकेण्डमा दौड पुरा गरी दोस्रो, सशस्त्रका जितेन्द्र राईले २ घण्टा ३८ मिनेट ४७ सेकेण्डमा दौड पुरा गरी तेस्रो भए । त्यसैगरी, केन्यन धावक गटिया पिटर मंगिया २ घण्टा ४१ मिनेट ५६ सकेण्डमा दौड पुरा गरी चौथो भए भने  विवेक चेपाङले ३ घण्टा ३१ मिनेटमा दौड पार गर्दै पाँचौ भए ।

प्रतियोगितामा प्रथम, दोस्रो, तेस्रो, चौथो र पाँचौं हुनेले क्रमश : ५० हजार, २५ हजार, १५ हजार र ५/५ हजार रुपैँयासहित शिल्ड, मेडल र प्रमाणपत्र प्राप्त गरेको आयोजकले जनाएको छ । प्रतियोगितामा १४ राष्ट्रिय धावकको सहभागिता रहेको थियो ।

भुकम्पमा परी निधन भएका पत्रकार सुमन भोञ्जनको स्मृतिमा बर्षेनी हुने फुटवल प्रतियोगिताका लागि आर्थिक सहयोग जुटाउने उद्देश्यले विहिबारदेखि राष्ट्रिय खेलकुद तथा व्यापार महोत्सव शुरु भएको छ ।