मुख्यमन्त्री बानियाँद्वारा नवज्योति क्लवको भवन उद्घाटन

२ साउन, हेटौंडा । हेटौंडा-६ चौघडामा रहेको नवजीवन ज्योति क्लव भवनको बागमती प्रदेशका मुख्यमन्त्री इन्द्रबहादुर बानियाँले उद्घाटन गरेका छन् । 
भौतिक पूर्वाधार विकास मन्त्रालयबाट प्राप्त रकम, पुरस्कार रकम, क्लबका सदस्यहरूको योगदान तथा स्थानीय जनप्रतिनिधिको आर्थिक सहयोगमा निर्माण भएको क्लब भवनको मुख्यमन्त्री बानियाँले उद्घाटन गरेका हुन् । 
कार्यक्रममा प्रतिवेदन प्रस्तुत गर्दै अध्यक्ष राजकुमार बास्तोलाले क्लबको भवन निर्माण तथा पूर्वाधार विकासमा बागमती प्रदेशका मुख्यमन्त्री इन्द्रबहादुर बानियाँको महत्वपूर्ण योगदान रहेको बताए । बानियाँको पहलमा शहरी विकास मन्त्रालय मकवानपुरमार्फत तीन चरणमा गरी ५५ लाख रुपैयाँ विनियोजन भएको क्लबले जनाएको छ । यसैगरी हेटौंडा उपमहानगरपालिकाका नगर उपप्रमुख राजेश बानियाँको पहलमा चार चरणमा गरी २७ लाख रुपैयाँ बजेट उपलब्ध भएको छ । प्राप्त बजेटमध्ये क्रमशः ४९ लाख र २४ लाख रुपैयाँ भवन निर्माणमा खर्च गरिएको छ। पुस्तकालय सञ्चालनका लागि ४ लाख रुपैयाँ बराबरको फर्निचर तथा ३ लाख रुपैयाँ बराबरका कम्प्युटर खरिदका लागि पनि सहयोग प्राप्त भएको छ। क्लवमार्फत रक्षादेवी टोललाई नमुना टोलका रूपमा विकास गर्ने अभियानअन्तर्गत हेटौंडा-६ का वडा अध्यक्ष विष्णुबहादुर दाहालले वडा कार्यालयबाट २ लाख रुपैयाँ सहयोग प्रदान गरेको कार्यक्रममा जानकारी दिइएको थियो ।
क्लबले सामाजिक, वातावरणीय तथा सामुदायिक विकासका क्षेत्रमा विगतदेखि नै सक्रिय भूमिका निर्वाह गर्दै आएको र पछिल्लो समय आफ्नै अत्याधुनिक भवन निर्माणसँगै पुस्तकालय, सूचना प्रविधि तथा सामुदायिक गतिविधिका लागि आवश्यक पूर्वाधार तयार भएपछि नवज्योति क्लब चौघडा यस क्षेत्रको गौरवका रूपमा स्थापित हुने कार्यक्रमका वक्ताहरूले बताए ।
क्लवका अध्यक्ष राजकुमार वास्तोलाको सभाध्यक्षतामा भएको कार्यक्रममा हेटौंडा उपमहानगरपालिकाका उपपमुख राजेश बानियाँ, क्लवका निवर्तमान अध्यक्ष श्रीराम पुडासैनी, पूर्व अध्यक्ष गणेशकुमार श्रेष्ठ, क्लवका सचिव राजकुमार फुँयाल लगायतले मन्तव्य गरेका थिए ।