५० बर्षमा खानेपानी धारा जडानपछि दिव्यनगरमा खुशीयाली

१ माघ, हेटौँडा । हेटौँडा–६ स्थित दिव्यनगरमा ५० बर्षपछि खानेपानी धारा जडान भएपछि खुशीयाली आएको छ ।
२०२६ सालमा हेटौँडा नगरपालिका स्थापना भएदेखि नै खानेपानीको माग गर्दै आएका स्थानीयले बुधबार पहिलो पटक गाउँमा खानेपानी धारा शुभारम्भ गरेका हुन् । हेटौँडा उपमहानगरपालिका वडा नम्बर ६ का वडा अध्यक्ष अर्जुनप्रसाद चौलागाईले दिव्यनगरमा पहिलो पटक जडान भएको स्थानीय केदार अधिकारीको घरको धारा उद्घाटन गरेका छन् । 
‘२०२६ सालपछि अहिलेसम्म स्थानीयको एउटै माग खानेपानी थियो, ५० बर्षपछि अहिले त्यो माग पुरा भएको छ ।’–उनले भने । स्थानीय तहको निर्वाचन भएसंगै जनताको माग अनुसार पहिलो प्राथमिकतामा राखेर खानेपानीको योजना अघि बढाएको उनले बताए । अध्यक्ष चौलागाईका अनुसार दिव्यनगर क्षेत्रको करिव ५० घरधुरीका लागि हेटौँडा उपमहानगरपालिका वडा नम्बर ६ को १५ लाख रुपैँया र हेटौँडा खानेपानी बोर्डको १५ लाख रुपैँया गरी ३० लाख रुपैँया लगानीमा पाईप लाईन पुर्याईएको छ । 
पाइप लाईन पुगेपछि स्थानीयले धमाधम खानेपानी धारा जडानका लागि आवेदन दिन शुरु गरेका छन् । ‘जतिपटक चुनाव आउँदा पनि हामीले उम्मेदवारहरुसंग खानेपानी योजनाको माग गर्ने गरेका थियौं ।’–धारा जडानपछि उत्साही अधिकारीले भने–‘बर्षौपछि अहिले गाउँमा सरकारी लगानीमा खानेपानी पाईप विस्तार भएको छ ।’ यस क्षेत्रका स्थानीय यसअघि एउटा ट्यांकीमा जंगलबाट पानी जम्मा गरी दुःखजिलो गरेर काम चलाउँदै आएका थिए । 
भुकम्पछि त्यो पानीको मुहान पनि सुकेपछि गाउँले काकाकुल झैं भएका थिए । खानेपानी पाईप विस्तार भएपछि ठूलो समस्याको रुपमा रहेको खानेपानीको समस्या अन्त्य भएको उनीहरुको भनाई छ ।