तार हालेको ३ बर्षसम्म धियालमा विजुली बलेन

५ असार, हेटौँडा । मकवानपुरको बकैया गाउँपालिका धियालमा विद्युतिकरण नहुँदा स्थानीय बासिन्दालाई समस्या परेको छ । पोल गाडेर तार हालेको ३ बर्ष पुगिसक्दा पनि धियालमा विद्युतिकरण हुन नसक्दा स्थानीयहरु समस्या भोगिरहेका हुन् ।
जिल्लाका सबै क्षेत्रमा विद्युतिकरण भईसक्दा पनि धियालका बासिन्दा अझै अन्धकारमा बस्न बाध्य छन् । विद्युतिकरण नहुँदा धियालका करिव ६ सय घरधुुरीका बासिन्दा अध्ययन, मोवाई चार्ज, कुटानी पिसानी, टिभि हेर्ने जस्ता सुविधाबाट बन्चित भएको स्थानीय सोना जिम्बाले बताईन् ।
विद्युतिकरणका लागि स्थानीय भुमेश्वरी सामुदायिक वनले ६ लाख र तत्कालिन धियाल गाविसले ६ लाख बजेट खर्चिसकेको छ । ३ किलोमिटर टाढाको मामदमार गाउँबाट काठे पोल गाडेर तार हालिसकेपनि अझै विजुली नबल्दा स्थानीय बासिन्दा निरास छन् । विद्युतिकरणका लागि हालसम्म सहयोग नगरेको नेपाल विद्युत प्राधिकरणले काठको पोल गाडेको भन्दै विद्युत सुचारु नगरेको स्थानीय रमेश लामा स्यांतानको गुनासो छ ।
बर्षौदेखि विजुली बाल्ने सपना बोकेका स्थानीयले यसबर्ष सांसद इन्द्रबहादुर बानियाँबाट प्राप्त क्षेत्र विकास कोषको १५ लाख र जिल्ला समन्वय समितिबाट प्राप्त ५ लाखबाट फलामका पोल फेरेर विद्युतिकरण गर्ने जनाएका छन् । धियालभरी नै विद्युतिकरणका लागि प्राधिकरण र स्थानीय निकायको सहयोग आवश्यक रहेको स्थानीयको भनाई छ ।