६० लाखमा प्रादेशिक सडक बनाउँछौ : बानियाँ

१७ असार, हेटौंडा । मकवानपुरको साजबोटे दोभान-भालुखोला हुँदै बाराको निजगढ जोड्ने सडकको ट्रयाक खोल्ने बारे शनिबार छलफल भएको छ ।
नेपाली कांंग्रेस मकवानपुरका सभापति एवं पूर्व गृहराज्यमन्त्री ईन्द्रबहादुर बानियाँको प्रमूख आतिथ्यता र साजबोटे पच्छेदमार भालुखोला निजगढ बारा सडक निर्माण उपभोक्ता समितिका अध्यक्ष लालबहादुर डिम्डुङको अध्यक्षतामा छलफल भएको हो ।
साजबोटेबाट निजगढ बारा जोड्ने ३० किलोमिटर सडक मध्ये २० किलोमिटर ट्रयाक खनिसकिएको र बाँकी १० किलोमिटर ट्रयाक खोली यसै वर्षदेखि प्रादेशिक सडकको रुपमा विस्तार गरिने पूर्व गृहराज्यमन्त्री बानियाँले बताए ।
माननीय कोष, हेटौंडा-१६, बकैया-६ सहित करिब ६० लाख रुपियाँ संकलन गरी तत्काल २ र ३ नम्बर प्रदेश जोड्ने प्रादेशिक सडक निर्माणको कार्य थालनी गरिने गर्न लागिएको मकवानपुर क्षेत्र नम्बर १ का सांसद समेत रहेका बानियाँले जानकारी दिए ।
छलफलमा उपभोक्ता समितिका अध्यक्ष डिमडुङ, प्रमूख अतिथि बानियाँ, नेपाली काँग्रेसका १ नम्बर क्षेत्रीय सभापति एवं बकैया गाउँपालिकाका प्रमूख दामोदर खनाल, हेटौंडा उपमहानगरपालिका १६ का वडा अध्यक्ष रामकृष्ण कोईराला, बकैयाँ गाउँपालिका ६ नम्बर वडा अध्यक्ष फुलमान भोम्जन, सेतेमान बललगायतले सडक विस्तारको सम्भावना, चुनौती बारे चर्चा गरेका थिए ।