सुरुङ मार्गको भ्रष्टाचार छानविनको माग

२८ भदौ, हेटौँडा । हेटौँडा–कुलेखानी–काठमाण्डौं सुरुङमार्गको नाममा भएको भ्रष्टाचारको छानविन गरी दोषीलाई कारवाहीको माग गरिएको छ । 
नेपाल पूर्वाधार विकास कम्पनीले जनताबाट उठाएको करोडौं रुपैँयाबाट भ्रष्टाचार गरेको भन्दै दोषिलाई कारवाहीको माग गरिएको हो । विगतदेखि नै कम्पनीले गरेका गलत कामको विरोधमा अभियान संचालन गरिरहेका हेटौँडाका भीमसेन महतले बुधबार पत्रकार सम्मेलन गर्दै दोषीलाई कानूनी दायरामा ल्याउनुपर्नेमा जोड दिए । उनले कम्पनीका संस्थापक अध्यक्ष कुशकुमार जोशीले मकवानपुरबासीले खसी, बोका, गरगहना, कृषिउपज विक्रि गरेर सुरुङ मार्ग निर्माणका लागि गरेको लगानीमा हिनामिना गरेको दावि गरे । 
उनले परियोजना निर्माणस्थलसम्म पहुँच मार्ग निर्माणका लागि काम नै नगरी ३९ लाख ८ हजार ५ सय ११ रुपैँया, क्यानेडेली कम्पनीबाट लगानी भित्र्याउन भन्दै उसका लागि १ करोड ३५ लाख रुपैँया, कम्प्युटर खरिदमा ४६ लाख, नायिका निशा अधिकारीलाई सगरमाथा चढ्नका लागि ५ लाख रुपैँया चन्दा लगायतका दर्जन भन्दा बढि शिर्षकमा हिनामिना गरेको दावि महतको छ । उनले संस्थापक अध्यक्ष जोशी सुरुङ मार्ग निर्माणमा भन्दा पनि आर्थिक लाभमा केन्द्रित भएको भन्दै राज्यले कम्पनीलाई सुरुङ मार्ग निर्माणका लागि दिएको अनुमति खारेजी गर्नु सही भएको बताए । उनले आप्mनो परेको लगानी उठाउनका लागि संगठित पहलका लागि मकवानपुरबासीलाई आग्रह गरेका छन् । 
राज्यले पनि अनुमति खारेज गर्नु अघि जनताको लगानी सुरक्षित गर्नेतर्फ ध्यान दिनुपर्नेमा जोड दिए । मकवानपुरका चर्चित राजनीतिज्ञ एवं समाजसेवी समेत रहेका महतले लामो समयदेखि सुरुङ मार्गका नाम भईरहेको भ्रष्टाचारबारे उजागर गर्दै आएका छन् ।

हेटौँडा–काठमाण्डौं सुरुङमार्गमा भ्रष्टाचारको यस्तो खुलासा