बागमती प्रदेशको पर्यटन प्रचारको लागि पत्रकारहरुको अध्ययन भ्रमण

२७ जेठ, हेटौंडा । बागमती प्रदेशमा रहेका पर्यटकीय क्षेत्रहरुको प्रचारप्रसारका लागि प्रदेशका पत्रकारहरुको टोली अध्ययन भ्रमणका लागि प्रस्थान गरेको छ । बागमती प्रदेशका १३ जिल्लाका पत्रकार महासंघका अध्यक्ष र प्रतिनिधिहरु प्रदेशको पर्यटकीय क्षेत्रको प्रचारप्रसारका लागि भ्रमणका लागि हेटौंडाबाट प्रस्थान गरेको हो । 
बागमती प्रदेशका संस्कृति तथा पर्यटन मन्त्री दिपेन्द्र श्रेष्ठले भ्रमण टोलीलाई विदाई गरेका छन् । कार्यक्रममा बोल्दै मन्त्री श्रेष्ठले पर्यटन क्षेत्रको प्रवद्र्धनका लागि प्रचारप्रसारको भूमिका महत्वपूर्ण भएकाले संचार क्षेत्रसंग सहकार्य गरिएको बताए । उनले संस्कृति एवं पर्यटन प्रवद्र्धनका लागि आउँदो बर्षलाई प्रदेशको संस्कृति तथा पर्यटन मन्त्रालयले ‘घुमघाम बर्ष’ को रुपमा मनाउन लागेकाले यसको प्रचारप्रसारका लागि समेत संचारकर्मीहरुसंग आग्रह गरे । उनले आफु संचारक्षेत्रसंग सहकार्य गर्न सधैं तयार रहेको बताए । 
कार्यक्रममा मन्त्रालयका सचिव मदन कोइराला, नेपाल पत्रकार महासंघका केन्द्रीय सदस्य सुनिल खड्का, बागमती प्रदेशका अध्यक्ष शिव देवकोटा, उपाध्यक्ष रुपेश दुलाल, महासचिव कृष्ण सारु मगर लगायत विभिन्न जिल्लाका पत्रकार महासंघका अध्यक्ष र प्रतिनिधिहरुको सहभागिता रहेको थियो ।
भ्रमण टोलीले बागमती प्रदेशका विभिन्न जिल्लाका सांस्कृतिक तथा पर्यटकीय क्षेत्रको भ्रमण गरी प्रचारप्रसारमा सहयोग गर्ने जनाईएको छ । मन्त्रालयले पत्रकारहरुको अध्ययन अवलोकन भ्रमण बर्षेनी गर्दै आएको छ ।