मनहरी हुँदै राक्सिराङ पुग्ने मोटरबाटो निर्माण कार्य सुरु 

२८ मंसिर, हेटौँडा । मकवानपुरको मनहरी गाउँपालिका हुँदै राक्सिराङ पुग्ने मोटरबाटो निर्माणको काम सुरु भएको छ । मनहरीबाट प्याङ्चे हुँदै राक्सिराङको चैनपुर जाने सडकको बिहीबार राक्सिराङ गाउँपालिका अध्यक्ष राजकुमार मल्लले शिलान्यास गरेका छन् । 
मोटरबाटोको रुपमा विकास गर्ने लक्ष्यसहित २०३४ सालबाट निर्माण कार्य थालनी गरिएको बाटो अहिले गोरेटोको रुपमा रहेको छ । अहिले मानिस हिँड्न समेत निकै अप्ठेरो रहेको बाटोलाई फराकिलो बनाएर ३ महिनाभित्र राक्सिराङ गाउँपालिकाको केन्द्रमा मोटर पु¥याउने लक्ष्यसहित काम अघि बढाइएको गाउँपालिका अध्यक्ष मल्लले जानकारी दिए । 
बाटो निर्माणको लागि गाउँपालिकाले एक करोड १७ लाख विनियोजन गरेको थियो । २०३४ सालमा खनेको बाटो अहिले गोरेटको रुपमा रहेको छ । मान्छे हिँड्न समेत निकै कष्ट हुने बाटोलाई फराकिलो बनाएर गाडी गुड्न मिल्ने बनाइने गाउँपालिका अध्यक्ष मल्लले जानकारी दिए । 
६ किलोमिटर बाटो निर्माणको लागि मनहरीबाट प्याङ्चे र प्याङ्चेबाट चैनपुर गरी २ भागमा विभाजन गरी २ वटा निर्माण उपभोक्ता समिति बनाइएको छ । बाटोको शिलान्यासमा गाउँपालिका उपाध्यक्ष निर्मला हिमडुङ, राक्सिराङ ४ र ५ नम्बर वडा अध्यक्ष चन्द्रसिँह प्रजा र रामकृष्ण प्रजा, निर्माण उपभोक्ता समूहका अध्यक्षद्वय खुसीलाल प्रजा र दीपक प्रजालगायतले बाटो निर्माणपश्चात राक्सिराङ गाउँपालिकाको केन्द्रबाट व्यापारिक केन्द्र मनहरी तथा बजारसम्म आवतजावन गर्न सहज हुने धारणा राखेका थिए ।