बानियाँ र न्यौपानेद्वारा विकासको काम

३ चैत, हेटौँडा । नेपाली काँग्रेस मकवानपुरका सभापति एवम् प्रदेशसभा सदस्य ईन्द्रबहादुर बानियाँ र स्थानीय नेता शंकर न्यापानेले मनहरी गाउँपालिका–३ स्थित कालिदमारमा नहर निर्माण गरिदिएका छन् ।

मसिनेखोलाबाट कालिदमार तथा बगौंडा फाँटमा सिँचाईको लागि बनाइएको नहर पुरेपछि बानियाँ र न्यौपानेले मर्मत गरिदिएका हुन् । गत बर्षको बाढी तथा पहिरोले नहर पुरिएपछि स्थानीय समस्यामा रहेका थिए । गत निर्वाचनमा विभिन्न राजनीतिक दलका उम्मेदवारले आफूले जिते नहर बनाइदिने आश्वासन दिएपनि कसैले मर्मत नगरेको भन्दै स्थानीय दुःखी भएका थिए ।

आफुहरु विकासका लागि निर्वाचनमा होमिएको भन्दै प्रदेशसभा सदस्य बानियाँले स्थानीयको माग अनुसार विकासको काम गर्दै जाने बताए । धान तथा तरकारी खेतिको लागि निकै राम्रो मानिने हाँडीखोलाका बासिन्दा गत असारको बाढीपहिरोले नहर बिगारिदिएपछि यस बर्ष खेत बाँझै राख्न बाध्य भएका थिए ।

यस्तै, स्थानीय तहको निर्वाचनमा मकवानपुरको मनहरी गाउँपालिकाको अध्यक्ष पदका उम्मेदवार रहेका न्यौपानेले सडक निर्माण गरेका छन् । उनले मनहरी गाउँपालिका–३ हाँडीखोलामा व्यक्तिगत लगानीमा बाटो निर्माणको काम गरिरहेका हुन् । न्यौपानेले आफ्नै मेसिन एवम् खर्चमा साविकको गाविस भवन, स्वास्थ्यचौकी हुँदै कौगेडी जाने मोटरबाटो निर्माण कार्य गरिरहेका छन् ।

स्थानीय निर्वाचनमा नेपाली काँग्रेसको तर्फबाट उम्मेदवार भएका उनी करिब ३ सय मतले पराजित भएका थिए । अन्य यस क्षेत्रका अन्य सडकको स्तरिकणको काम पनि गरेको जनाईएको छ ।