भुकम्पमा घर भत्किएका लालपुर्जाविहिनले अनुदान पाउने

९ बैशाख, हेटौँडा । भुकम्पमा घर भत्किएका जग्गाधनी प्रमाणपुर्जा (लालपुर्जा) विहिनहरुले पनि नयाँ घर बनाउनका लागि अनुदान पाएका छन् । 
प्राविधिकको निरिक्षणबाट लाभग्राही सूचिमा परेर पनि लालपुर्जा नहुँदा सम्झौता गर्नबाट बन्चितहरुले अब सम्झौता गरेर नयाँ घर बनाउन पाउने भएका छन् । मकवानपुरगढी गाउँपालिका २ वडा कार्यालयले यस्तो समस्यामा रहेका भुकम्पपीडितहरुलाई सम्झौताका लागि सूचना प्रकाशित गरेको छ । सूचनामा भुकम्पमा घर क्षति भई लाभग्राही सुचिमा नाम समावेश भई लाभग्राहीको नाममा वा लाभग्राहीको परिवारको नाममा जग्गाधनी प्रमाण पुर्जा नभई आवास पुनर्निर्माण सम्झौता गर्न बाँकी रहेका लाभग्राहीलाई बैशाख १५ गतेसम्म सम्पर्क गर्न भनिएको छ । 
वडा कार्यालयले त्यस्ता लाभग्राहीले परम्परादेखि भोग गर्दै आएको जग्गामा घरवारको क्रममा जडान भएका धारा, विद्युत, टोलीफोन र खानेपानी संस्थानको बिल आदिको प्रमाण पेश गर्न अनुरोध गरेको अध्यक्ष बखानसिं पाख्रिनले बताए । मकवानपुरमा जग्गाधनी प्रमाणपुर्जाको अभावमा पुर्ननिर्माणका लागि सम्झौता गर्नबाट बन्चितको संख्या ठूलो छ । पछिल्लो व्यवस्थाले यस्ता लाभग्राहीहरु लाभान्वित हुने भएका छन् ।