चौघडाको यात्रु प्रतिक्षालय उदघाटन

२ जेठ, हेटौँडा । हेटौडा–६ चौघडामा रहेको रानी सामुदायिक वन उपभोक्ता समूहले निर्माण गरेको यात्रु प्रतिक्षालयको विहिवार उदघाटन गरिएको छ । वन समूहको चालु आव ०७५/०७६ को स्वीकृत बार्षिक कार्यक्रम अनुसार प्रतिक्षालय निर्माण गरिएको हो । हेटौडा–६ का वडा अध्यक्ष अर्जुनप्रसाद चौलागाईले एक कार्यक्रमका विच रिवन काटेर उदघाटन गरेका छन् । यात्रु प्रतिक्षालय हेटौडा–६ चौघडाको मध्यभागमा निर्माण गरिएको छ । 
सवारी साधनमा यात्रा गर्ने यात्रु,बटुवा र स्थानीयको सेवा सुविधालाई मध्यनजर गर्दै प्रतिक्षालय निर्माण गरिएको निर्माण उपसमितिकी सदस्य सन्ध्या श्रेष्ठले बताईन् । प्रतिक्षालय करीव ५० हजारको लागतमा निर्माण गरिएको हो । प्रतिक्षालय निर्माणले उपभोक्ताको साथै बाटोमा हिड्ने बटुवा,विद्यार्थी समेतलाई सुविधा पुगेको उपभोक्ता बिमला सापकोटाले बताईन ।
प्रतिक्षालय निर्माण उपसमितिका संयोजक केशव धितालको अध्यक्षतामा भएको उदघाटन कार्यक्रममा सामुदायिक वन उपभोक्ता महासंघ,मकवानपुरका अध्यक्ष साधुराम चौलागाई, रानी सामुदायिक वनका अध्यक्ष कृष्ण विडारी, जनकल्याण बचत तथा ऋण सहकारीका अध्यक्ष हिमाल पौडेल,समूहका उपाध्यक्ष डोरबहादुर अधिकारी, कार्यालय सचिव भीमसेन पौडेल लगायतकाले मन्तव्य व्यक्त गरेका थिए । कार्यक्रममा हेटौडा–६ का वडा सदस्य राजकुमार बास्तोला, रामहरी राई, शुभद्रा तिमल्सिना, चौघडा सहकारीका अध्यक्ष श्यामप्रसाद श्रेष्ठ,नेपाल टेलिकम चौघडा शाखा प्रमुख रामहरी तिमल्सिना,न्यूरेनी चिसापानी सामुदायिक वनका उपाध्यक्ष रामचन्द्र अधिकारी लगायतको उपस्थिति रहेको थियो ।