कुलेखानीका दुबै युनिट पूर्ण क्षमतामा संचालनमा

३० असार, हेटौँडा । कुलेखानी जलविद्युत आयोजनाको दुबै युनिट पूर्ण क्षमतामा संचालनमा ल्याईएको छ । नेपाल विद्युत प्राधिकरणको पावर व्याकपको रुपमा रहेको यो आयोजना सोमबार विहानदेखि पूर्ण क्षमतामा संचालनमा ल्याईएको हो । 
पूर्ण क्षमतामा संचालनमा आउँदा पहिलोबाट ६० र दोस्रोबाट ३२ गरी ९२ मेगावाट विद्युत उत्पादन हुने गरेको छ । सामान्य अवस्थामा कुलेखानी जलविद्युत आयोजना केन्द्र प्रसारणमा भार व्यवस्थापनका लागि अत्यावश्यक बेलामा मात्रै संचालनमा ल्याईन्छ । तर जलाशयमा पानीको सतह बढ्न थालेपछि पानीको सहत घटाउनका लागि पनि यसको सदुपयोग गरेको आयोजनाका कर्मचारीहरुको भनाई छ । कुलेखानीको ईन्द्रसरोबर जलासयको सतह बढ्न थालेपछि ड्यामको ढोका खोल्ने तयारी भईरहदा दुई युनिट संचालनमा ल्याईएको हो । 
कुलेखानी संचालन गरिरहँदा पानी सतह स्थिर वा घटेमा ड्यामको ढोका खोल्ने सम्भावना कम हुने जनाईएको छ । तर सतह बढे ड्यामको सुरक्षाका लागि ढोका खोलेर पानी निकास गर्ने तयारी प्राधिकरणको छ । यसका लागि जिल्ला प्रशासन कार्यालय मकवानपुरले मकवानपुरका ईन्द्रसरोबर, भीमफेदी र बागमति गाउँपालिका संगै सिन्धुली, रौतहट र सर्लाहीका नदि किनारका बासिन्दालाई सर्तक रहन भनिएको छ ।