हेटौँडामा २५ मिटर विस्तार अन्तरिम आदेशले रोकियो

७ साउन, हेटौँडा । हेटौँडामा २५ मिटर सडक विस्तारको काम सर्वोच्च अदालतको अन्तरिम आदेशका कारण रोकिएको छ ।
डिभिजन सडक कार्यालय हेटौँडाले सडक विस्तारको काम थालेपनि अदालतको अन्तरिम आदेशका कारण काम रोकिएको हो । हेटौँडाका ९० प्रतिशत घरधनीले अदालतबाट डिभिजन सडकका नाममा काम अघि नबढाउन अन्तरिम आदेश लिएर बसेका छन् । ‘हेटौँडा बजारका ९० प्रतिशत घरको अदालतबाट ‘स्टे अर्डर’ छ, त्यसैले काम अघि बढाउन नसकिएको हो ।’–कार्यालयका सूचना अधिकारी जयराम अधिकारीले भने । 
अदालतको आदेशका कारण रोकिएको काम अघि बढाउन कार्यालय पनि कानूनी उपचारको बाटो खोजिरहेको छ । अधिकारीका अनुसार कार्यालयले पनि अन्तरिम आदेशबारे कानूनी ढंगले छलफल गरिरहेको र यसको निराकरण पछि सडक विस्तारको काम अघि बढ्ने छ । बजार क्षेत्रको लगत संकलनको काम समेत सकिएकाले कानूनी समस्या समाधान भए लगतै सडक विस्तारको काम अघि बढ्ने भएको छ । 
पूर्व–पश्चिम राजमार्ग विस्तारको काम भने नरोकिने कार्यालयले जनाएको छ । मकवानपुरको लोथर क्षेत्रमा पनि स्थानीयले आफैं भौतिक संरचना भत्काईरहेको र बाराको अमलेखगञ्ज क्षेत्रमा पनि स्थानीय नै अग्रसर भएको अधिकारीले जानकारी दिए ।