सडक विस्तारको काम रोक्ने प्रयास असफल, हेटौंडा बन्दको घोषणा

४ माघ, हेटौंडा । हेटौंडामा सडक विस्तारको काम रोक्ने मंगलबार दिनभरको प्रयास असफल भएको छ । 

जिल्लाका राजनीतिक दल र मकवानपुर उद्योग बाणिज्य संघको टोलीले दिनभर दौडधुप गरे पनि सडक विस्तारको काम नरोकिने भएको हो । राजनीतिक दलको बैठकले मुअाव्जा र समय माग्ने अान्तरिक सहमति गरेर क्षेत्रीय प्रशासन कार्यालयमा छलफल गरेपनि निष्कर्ष निस्कन सकेन । त्यस्तै उद्योग बाणिज्य संघको टोलीले गृहमन्त्री विमलेन्द्र निधिलाई सिमरा पुगेर अाफ्नो मागबारे ध्यानाकर्षण गराएको थियो । राजधानीमा सक्रिय टिमबाट पनि सकारात्मक जवाफ अाएन ।

प्रशासन र सडक सडक विस्तारमा पछि नहट्ने बुझेपछि संघ संयोजक रहेको हेटौडा बसोबास  संरक्षण समितिले बुधबार हेटौंडा बन्दको घोषणा गरेको छ । समितिले २५ मीटर भित्र पर्ने निजी सम्पत्तिको मुआब्जा नदिई सडक कार्यालयले सडक विस्तार गर्न लागेकोमा विरोध जनाएको छ । सडक ऐन नबन्दै पूर्वपश्चिम राजमार्ग बन्नु अघि नै वि.स. २०११ साल देखि नै बसोबास गर्दै आएको  समितिको भनाई छ । 

डिभिजन सडक कार्यालय, जिल्ला प्रशासन कार्यालय, क्षेत्रीय प्रशासन कार्यालयसँग मुआब्जाको विषयमा गरिएको छलफल विना निष्कर्ष टुंगिएकाले बजार बन्द गरी आन्दोलन गर्न थालेको हेटौडा बसोबास संरक्षण समितिले जनाएको छ । 
केही दिन अघिबाट सडक डिभिजन कार्यालयले २५ मीटर भित्र पर्ने सरकारी स्वामित्वका भौतिक संरचना भत्काई सकेको छ भने मंगलबारदेखि निजी घर तथा टहरा भत्काउन थालेको छ ।