निजगढ स्मार्ट सिटि बन्ने, हेटौँडा चाँही ?

१७ माघ, हेटौँडा । सरकारले बाराको निजगढलाई ‘स्मार्ट सिटि’ बनाउने भएको छ । सरकारले निजगढसहित ६ वटा शहरलाई स्मार्ट सिटिको रुपमा विकास गर्ने भएको हो ।

काठमाण्डौं उपत्यकामा एक र उपत्यका बाहिर ६ वटा स्मार्ट सिटि बनाउने अवधारणा अनुसार निजगढ छनौटमा परेको छ । निजगढसहित लुम्बिनी, पालुङटार, वालिङ, दुल्लु र अमरगढीलाई पनि स्मार्ट सिटिको रुपमा विकास गरिने भएको छ । निजगढ, पालुङटार र लुम्बिनीलाई स्मार्ट सिटि बनाउन परामर्शदाता नियुक्त गर्न आशयपत्र माग गरिसकेको नयाँ शहर आयोजनाका निर्देशक चक्रवर्ती कण्ठले बताए । स्मार्ट सिटिमा खानेपानी, स्वास्थ्य, शिक्षा, व्यापार, यातायात लगायतका सबै सेवा सूचना प्रविधिसँग जोडिएको र डिजिटलाईज गरिएको हुन्छ । स्मार्ट सिटिको विकास सँगै व्यवस्थित शहरीकरण अघि बढ्ने छ ।

हेटौँडा भन्दा पछि शहरको रुपमा विकास भएको निजगढ स्मार्ट सिटि बनिरहँदा हेटौँडा भने आफ्नो पुरानो अवस्थाबाट माथि उठ्न सकेको छैन । हेटौँडालाई स्मार्ट सिटिको बनाउने र औद्योगिक जिल्लाको रुपमा विकास गर्ने रटान रटेको बर्षौं भईसक्दा पनि न औद्योगिक जिल्ला घोषणा भयो न स्मार्ट सिटिबारे कतै चर्चा छ । धरान–चतरा, कान्तिलोकपथ, फाष्ट ट्रयाक, पूर्वपश्चिम राजमार्गको संगम रहेको मकवानपुर दुईवटा विद्युत आयोजना र पुरानो औद्योगिक क्षेत्र भएको जिल्ला ओझेलमा पर्दैछ । मकवानपुरमा विकासबारे केन्द्रमा लविङ गर्न दलहरु एक मत नहुँदा मकवानपुर बर्षेनी ओझेलमा पर्दै गएको जानकारहरु बताउँछन् ।

‘हेटौँडाका पुराना अग्रजले जिल्ला छोड्ने क्रम जारी छ, अब हेटौँडा आप्रवासीहरुको शहर मात्रै हुने भएको छ ।’–एक नेताले भने । राजनैतिक दलका नेता र सांसदहरुले बृहत र दिगो विकासका योजना नल्याए छिमेकी शहरहरुको तुलनामा हेटौँडा दिनप्रतिदिन ओझेलमा पर्ने उनको भनाई छ ।