सम्झौताको ९ बर्षपछि गौरीटारमा पोलिटेक्निक इन्स्टिच्युटको शिलान्यास

१९ कार्तिक, हेटौँडा । निर्माण सम्झौताको ९ बर्षपछि हेटौँडा–६ गौरीटार (चित्रेपानी) मा नेपाल भारत मैत्री पोलिटेक्निक इन्स्टिच्युटको शिलान्यास भएको छ । ३ नम्बर प्रदेशका मूख्यमन्त्री डोरमणी पौडेल र भारतीय दुतावासका चार्ज डिअफेयर्स डा. अजयकुमारले इन्स्टिच्युटको मंगलबार शिलान्यास गरेका हुन् ।
मूख्यमन्त्री पौडेलले देशभरका औद्योगिक क्षेत्रमा आवश्यक जनशक्तिको पूर्तिका लागि प्राविधिक शिक्षा आवश्यक रहेको बताए । उनले लामो समयदेखिको सपनाको रुपमा रहेको पोलिटेक्निक इन्स्टिच्युटको शिलान्यास भएको भन्दै समयमै काम सम्पन्न हुनुपर्नेमा जोड दिए । उनले यस प्राविधिक शिक्षालयको स्थापनाले प्राविधिक क्षेत्रमा आवश्यक जनशक्तिको आवश्यकता पुरा गर्न सहयोग गर्ने बताए । उनले प्रदेश सरकारले गाउँ तहसम्म प्राविधिक शिक्षा पु¥याउने लक्ष्य लिएको बताए । कार्यक्रममा प्रदेश सरकारका मन्त्री, जनप्रतिनिधि र स्थानीयको उपस्थिति रहेको थियो ।
नेपालका प्रथम राष्ट्रपति डा. रामवरण यादवको २०६६ फागुन ४ गते भएको पहिलो औपचारिक भारत भ्रमणका क्रममा शिक्षालय स्थापनाका लागि नेपाल सरकार र भारत सरकारबीच सम्झौता भएको थियो । भारत सरकारको ५८ करोड ४८ लाख रुपैँया आर्थिक सहयोग बन्न लागेको शिक्षालयमा सिटिईभिटि अन्तरगत इलेक्ट्रिकल इन्जिनियरिङ, इलोक्ट्रोनिक एवं कम्युनिकेशन इन्जिनियरिङ, मेकानिकल इन्जिनियरिङ र कम्प्युटर इन्जिनियरिङ जस्ता ३ बर्षे डिम्प्लोमा कोर्ष संचालन हुनेछन् । साढे १७ हेक्टर क्षेत्रफलमा निर्माण हुन लागेको पोलिटेक्निकल इन्स्टिच्युटमा प्रत्येक विषयका लागि ४२/४२ जनाको कोटाको व्यवस्था गरिनेछ ।
स्थानीय माग अनुसार छोटो अवधीका हाउस वायरिङ, मोटर रिवाईन्डिङ, प्लम्बर, इलेक्ट्रिसियन, सिकर्मी, डकर्मी जस्ता १७ विभिन्न शिर्षकका कक्षा समेत महाविद्यालयमा संचालन हुनेछन् । सहमति अनुसार इन्स्टिच्युट संचालनको पहिलो ५ बर्षसम्म भारत र नेपालका बराबर कर्मचारीहरुको व्यवस्था गरिने छ भने ५ बर्षपछि भारतले आफ्नो कर्मचारीहरुको संख्या आधा घटाई १० बर्ष पछि पोलिटेक्निक इन्स्टिच्युट नेपाल सरकारलाई हस्तान्तरण गर्नेछ ।