विपन्न मिठुमायाले पाइन् घर, बानियाँद्वारा हस्तान्तरण

२ कार्तिक, हेटौंडा । बागमती प्रदेशका मुख्यमन्त्री इन्द्रबहादुर बानियाँले एकल महिलालाई घर हस्तान्तरण गरेका छन् । उनले मनहरी-९ की मिठुमाया सुनारको हस्तान्तरण गरेका हुन् ।
मुख्यमन्त्री बानियाँले आफ्नो सेवा सुविधाबाट प्राप्त हुने पारिश्रमिक र निजी खर्च ४ लाख ६५ हजार रुपैयाँ खर्चिएर मिठुमायाका लागि भूकम्प प्रतिरोधी घर निर्माण गरिदिएका थिए । आरसीसी पिल्लर सिस्टमको घरमा ३ कोठा, शौचालय, बत्ती, पानी लगायतको सुविधा छ ।
मुख्यमन्त्री बानियाँले बाख्रा पालन गरी जीविकोपार्जन गर्न मिठुमायालाई २० हजार रुपैयाँ आर्थिक सहायता समेत प्रदान गरेका छन् ।
‘हामीले राजनीति गरेको मानवताका लागि हो । मान्छेको सेवा गर्नको लागि हो,’ घर हस्तान्तरण कार्यक्रममा मुख्यमन्त्री बानियाँले भने, ‘बीपीले भन्नुभए अनुसार गरिबलाई न्याय, गरिबलाई आयको सिद्धान्तमा हामी अघि बढिरहेका छौँ । गरिबमुखी, गाउँमुखी, विकासमुखी र जनमुखी काम गर्न हामी प्रतिबद्ध छौँ ।’
मुख्यमन्त्री नियुक्त भएपछि मुख्यमन्त्री बानियाँले आफ्नो पारिश्रमिकबाट घरबारविहीन विपन्न दलित तथा एकल महिलाका लागि घर निर्माण गरिदिने घोषणा गरेका थिए । 
मुख्यमन्त्री बानियाँले आफ्नो व्यक्तिगत लगानी र मुख्यमन्त्रीको सुविधाबाट मकवानपुरको राक्सिराङ र कैलाशमा थप २ वटा यस्ता घर निर्माण गर्दैछन् । हस्तान्तरण गरिएको घर सरकारी अनुमान अनुसार करिब ७ लाख लागतको भए पनि स्थानीयको सहयोग र विभिन्न सामग्रीमा सहुलियत पाएकाले ४ लाख ६५ हजारमा निर्माण सम्पन्न भएको बानियाँले बताए ।

कार्यक्रममा सहकारी तथा गरिबी निवारण मन्त्री बिनु रायमाझी, मनहरी गाउँपालिकाका अध्यक्ष रन्जन कालाखेती, नेपाली कांग्रेस बागमती प्रदेश सदस्य जानकी लामा लगायतको सहभागिता रहेको थियो ।