धरान–चतरा आयोजनालाई मंसिर १९ गते उपस्थित हुन अदालतको आदेश

१२ मंसिर, हेटौँडा । पाटन उच्च अदालत हेटौँडा इजलासले धरान–चतरा सडक आयोजनालाई मंसिर १९ गते अदालतमा उपस्थित हुन आदेश दिएको छ ।
अदालतका न्यायाधिश शिवराज अधिकारीको इजलासले सोमबार धरान–चतरा सडक आयोजनासहित ११ जना विपक्षीका नाममा कारण देखाउ आदेश जारी गर्दै मंसिर १९ गते अदालतमा उपस्थित हुन आदेश दिएको हो । हेटौँडा–६ मा रहेका धरान–चतरा सडक आयोजना प्रभावित स्थानीयले गत बुधबार अदालतमा रिट दायर गरेका थिए । उनीहरुले आफुहरुलाई जग्गाको मुआव्जा र संरचनाको क्षतिपूर्ति उपलव्ध हुनुपर्ने भन्दै मुद्धा दर्ता प्रक्रिया अघि बढाएका थिए । 
सडक आयोजना प्रभावितहरुले धरान–चतरा सडक योजन हेटौँडा, योजना प्रमुख, हेटौँडा उपमहानगरपालिका, हेटौँडा ६ नम्बर वडा कार्यालय, मकवानपुरका प्रमुख जिल्ला अधिकारी, मालपोत कार्यालय मकवानपुर, नापि कार्यालय मकवानपुर, कालिका कन्स्ट्रक्शनसहित ११ निकायलाई विपक्षी बनाई पाटन उच्च अदालत हेटौँडा इजलासमा रित दायर गरेका थिए ।
धरान–चतरा–गाईघाट–कटारी–सिुन्धुली–हेटौँडा सडक आयोजनाले सडकको १५-१५ मिटरभित्र पर्ने घर टहराको क्षतिपूर्तिका लागि वडा कार्यालयलाई विवरण तयार गर्न सूचना पठाएपछि स्थानीयले असहमति जनाएका छन् । भौतिक संरचनाको मात्रै क्षतिपूर्ति उपलव्ध गराउने सडक आयोजनाको भनाई प्रति आफुहरुको असहमति रहेको स्थानीयको भनाई छ । सडक विस्तारका क्रममा धेरैको जग्गा पूर्ण रुपमा सडकमा पर्ने भएकाले मुआव्जा विना सडक विस्तार हुन नसक्ने उनीहरुको भनाई छ ।
सडक विस्तारका क्रममा हेटौँडा–६ को चौघडादेखि रंगशालासम्मका करिब ३ सय घरधनी प्रभावित हुने भएका छन् ।

यो पनि पढ्नुस्

अदालतमा मुद्धा हाल्दै धरान–चतरा प्रभावित स्थानीय

विहिबार पनि धरान–चतरा प्रभावितद्वारा रिट दर्ता जारी