फाष्ट ट्रयाकको काममा बकैयाका स्थानीयबाट अवरोध

File Photo

१२ पुस, हेटौँडा । काठमाडौं तराई जोड्ने द्रुतमार्ग अन्तरगत मकवानपुरको बकैया गाउँपालिका वडा नम्बर ५ स्थित जारी काममा स्थानीयले अवरोध गरेका छन् । उक्त खण्डबाट झरेको माटोले बस्ति प्रभावित हुने भएकोले स्थानीयले विहीबारबाट काम नै रोकेका हुन् । 
यस अघि पनि काममा अवरोध गरेपछि व्यवस्थित गर्ने प्रतिवद्धता जनाएकाले काम सुचारु भएको थियो । यो पटक भने अनिश्चितकालका लागि बन्द गरिएको स्थानीय अर्जुन खड्काले जानकारी दिए । बकैया वडा नम्बर ५को तीनतले, मसाने, भडौरा र बुदुने क्षेत्रको ठूलो वस्ति उक्त कामबाट प्रभावित भइरहेको छ । ‘बस्तिभन्दा माथी बाटोको काम भइरहेको छ,’ स्थानीय केदार अर्यालले भने, ‘त्यहाँबाट खसालिएको माटोले बस्तिलाई ठूलो प्रभाव परिरहेको छ । एक त धुलोको असर धेरै नै छ अर्को वर्षायाममा ठूलो क्षति हुने सम्भावना छ ।’ यसका लागि ठेकेदार र सेनासँग पटकपटक कुरा भए पनि सुनुवाई नभएपछि काममा अवरोध गर्न परेको उनले बताए । 
विहीबार स्थानीयले फास्टट्«याकमा काम गरिरहेको ५२ वटा सवारी उपकरणहरुको चावि लिएर सेनालाई जिम्मा लगाएका छन् । आफूहरुको माग सम्बोधन नभएसम्म काम सुरु हुन नदिने स्थानीयले बताएका छन् । फास्टट्«याकको माटोको कारण खोल्साहरु सुकेको र खोलामा पनि पानीको सतह निकै घटेको छ । बर्षायाममा यसबाट निकै ठूलो क्षति हुन सक्ने स्थानीयको भनाई छ ।
स्थानीयले सेनासँगै ठेकेदार र गाउँपालिकासँग पनि आफूहरुको समस्या बताएको भन्दै सुनावाई नभएको गुनासो गरेका छन् ।