पुल निर्माणका लागि प्रदेश र स्विस सरकारबीच सम्झौता

२९ पुस, हेटौँडा । प्रदेश नम्बर ३ मा निर्माण हुने विभिन्न पुलहरु निर्माणका लागि  प्रदेश नम्बर ३  सरकार र स्विस सरकारसंग बिच सम्झौतामा हस्ताक्षर भएको छ । 
प्रदेश सरकारबाट निर्माण हुने स्थानिय सडकको मोटरजाने पुल निर्माणका लागि चाहिने आवश्यक प्राविधिक सहयोग गर्न प्रदेशको भौतिक मन्त्रालय र लोकल ब्रिज रोड प्रोग्राम (एलआरबीपी) को टोलीबीच आईतबार हस्ताक्षर भएको छ । नेपाल सरकार र स्विस सरकारबीच नेपाल सरकारलाई विभिन्न सहयोग गर्ने सम्झौता भएअनुरुप स्विस सरकारले प्रदेशलाई पनि सहयोग गर्न लागेको सम्झौता कार्यक्रममा बताईएको छ  ।
प्रदेश नम्बर ३ का मुख्यमन्त्री डोरमणि पौडेलको उपस्थितिमा भौतिक पूर्वाधार बिकास मन्त्रालयका सचिव कौशलकिशोर झा र एलआरबीपीका टोली नेता बेह्नम दलिलिबीच सम्झौता पत्र आदान प्रदान गरी सम्झौतामा भएको हो । 
पुल निर्माणकार्यको  सुरुवाती देखि  सम्पन्न हुने समयसम्मको प्राविधिक खर्च पुलको डिजाईन, सर्भे, रिपोर्ट तयार, जाँच तथा अनुगमन सबै एलआरबीपिले नै गर्ने र खर्च पनि व्यहोर्ने टोलीका उपनेता शकिल मानन्धरले जानकारी दिए । 
कार्यक्रममा प्रमुख सचिब आनन्दराज ढकाल, मुख्यमन्त्री डोरमणि पौडेलका प्रमुख राजनितिक सल्लाहकार जेएन थपलिया, मुख्यमन्त्री तथा मन्त्रिपरिषदका सचिब रमेश शिवाकोटी, भौतिक पूर्वाधार निर्देशनालयका प्रमुख महेशचन्द्र न्यौपानकोे सहभागिता रहेको थियो ।