बालुवा चालेर कपिकलमको जोहो

६ असार, हेटौँडा । मकवानपुरको विकट कैलाश गाउँपालिका जलुके र खोलाखर्कका बालबालिका बालुवा चालेर कपिकलमको जोहो गर्ने गरेका छन् । 
बालबालिकाहरु बिदाको दिन नियमित रुपमा बालुवा चाल्न जलुके र खोलाखर्कको सिमानामा रहेको खोलामा आउने गरेका हुन् । छ्याङ्दुङमा रहेको कमला मावि र जलुकेमा रहेको साङ्गे छयोलिङ आधारभुत विद्यालयका १५ देखि २० जना विद्यार्थीहरु यसरी बालुवा चाल्न आउने गरेको स्थानीय एक बृद्धले बताए । ‘बालुवा चालेर कमाएको पैसाले कपिकलम किन्ने गरेका छौं ।’–स्थानीय क्षितिज लामाले भने । 
आफुहरु समूह बनाएर बालुवा चाल्ने गरेको र एक बोराको ३० रुपैँया कमाउने गरेको कमला माविमा कक्षा २ मा अध्ययनरत प्रदिप योञ्जनले बताए । दिनमा ४ देखि ५ बोरा बालुवा चाल्ने गरेको उनीहरुको भनाई छ । घरायसी आर्थिक अवस्था कमजोर भएकाले यस क्षेत्रका केही बालबालिका विद्यालय नगई बालुवा चाल्ने काममा आउने गरेको स्थानीयको भनाई छ । 
खोलखर्क पुगेका जिविसका सामाजिक विकास अधिकृत रामकृष्ण थापाले विद्यालय नगई बालुवा चालिरहेका बालबालिकालाई विद्यालय जान सुझाव दिएका थिए । स्थानीय अगुवाहरुलाई बालबालिकालाई अध्ययनमा लगाउन थापाले आग्रह गरे । तामाङ, मगर र गुरुङ समुदायको बसोबास रहेको यस क्षेत्रमा धेरै बालबालिका विद्यालय नगई घरायसी काम, खेतिपाति र मजदुरीमा जाने एक विद्यालयका शिक्षकले बताए । 
बालबालिकाका नाममा ‘डलर खेति’ गर्ने संघसंस्था दुगर्ममा पुग्ने नगरेको ति शिक्षकको गुनासो छ ।