एसईईका विद्यार्थीलाई विद्यालयबाटै खानाको व्यवस्था

एसईई तयारी गरिरहेका विद्यार्थी विद्यालयमा खाना खाँदै

८ फागुन, हेटौंडा । मकवानपुरको एक विद्यालयले एसईईको तयारी गरिरहेका कक्षा १० का विद्यार्थीलाई खानाको व्यवस्था गरी अध्यापन गरिरहेको छ । कैलाश गाउँपालिका-१० मर्याङकोटस्थित रत्न ज्योति माविले एसईईको तयारी गरिरहेका विद्यार्थीहरुलाई खानाको व्यवस्था गरी अध्यापन गरिरहेको हो । 
विद्यालयबाट २ घण्टासम्मको दुरीबाट विद्यार्थीहरु एसईई तयारी एवं नियमित कक्षा अध्ययनका लागि आउनु पर्ने भएकाले विद्यालयले विहानको खानाको व्यवस्था गरेको सहायक प्रधानाध्यापक निर्जन दुलालले जानकारी दिए । ‘विहान सबेरैबाट कोचिङ शुरु हुने र दिउँसो नियमित कक्षा पनि हुने भएकाले २ घण्टा दुरीसम्मका विद्यार्थीले घरमा खाना खान नभ्याउने भएकाले विद्यालयले आफ्नो आन्तरिक स्रोतबाट विहानी खानाको व्यवस्था गरेको छ ।’–उनले भने । विद्यालयले कक्षा १० मा अध्ययनरत २४ जना विद्यार्थीलाई विहान खानाको व्यवस्था गरेको छ भने दैनिक आउजाउ गर्न नभ्याउने ६ जना विद्यार्थीलाई आवासको व्यवस्था गरेको छ । 
माघ २१ गतेबाट विद्यालयले उनीहरुलाई खानाको सुविधा दिईरहेको र दैनिक करिब ३ हजार रुपैंया खर्च भईरहेको सहायक प्रधानाध्यापक दुलालको भनाई छ । विद्यालयसंग पर्याप्त स्रोत नहुँदा पनि जसोतसो विद्यार्थीहरुको एसईई तयारीमा असर नपरोस् भनेर यस्तो व्यवस्था गरेको विद्यालयले जनाएको छ । यसबर्षको एसईई कक्षा चैत १५ गतेबाट शुरु हुने भएकाले यो अवधीसम्म विद्यार्थीहरुलाई यस्तो सुविधा उपलव्ध गराउने विद्यालयको भनाई छ ।