अब मकवानपुरको कैलाशमा पनि जीपलाइन

कास्कीको जीपलाईन अवलोकन गर्दै मुक्तान सहितको टोली

११ फागुन, हेटौंडा। मकवानपुरको विकट मानिएको कैलाश गाउँपालिकामा पनि जीपलाईन संचालनमा आउने भएको छ। कैलाश वडा नम्बर २ मा जीपलाईन निर्माण हुनेछ। 
कैलाश गाउँपालिका अध्यक्ष लोकबहादुर मोक्तानले निर्माण कार्य पुरा गरेर छिटो भन्दा छिटो जीपलाईन  सञ्चालन  गरिने बताएका छन्। अघ्यक्ष मुक्तानले एक साताभित्र परीक्षण गर्ने तयारीमा रहेको सोही अनुसार काम अगाडी बढि रहेको बताएका छन् ।
धार्मिक तथा पर्यटकीय प्रवद्र्धनका लागि बुहवर्षिय योजना बनाई ठेक्का प्रणालीमा कार्य गरिएको अध्यक्ष मोक्तानले बताए । कैलाश र बैकुण्ठका दुई धार्मिक तथा पर्यटकीय स्थलका पहाडलाई जोड्ने गरी जीपलाईन निर्माण गरिएको जनाइएको छ। 
उक्त जीपलाईन १२ सय मिटर लामो रहेको र जीपलाईन बाहेकका अन्य संरचना निर्माण गर्न समेत बाकीँ रहेको अध्यक्ष मुक्तानले जनाएका छन् ।
आर्थिक बर्ष २०८०। ०८१ म फोरजी कम्पनीले सम्भाव्यता अध्ययन पश्चात काम सुरु गरिएको हो। यता गाउँपालिका अध्यक्ष लोकबहादुर मुक्तान सहित पालिका उपाध्यक्ष बालकुमार मल्ल ठकुरी, प्रमुख प्रशासकीय अधिकृत अमुल श्रेष्ठ, लेखा प्रमुख नवीन धिताल, योजना शाखा प्रमुख नरेन्द्र दत्त भट्ट र पालिकाका प्राविधिकहरुको टोलीले शनिबार कास्की साराङकोटमा सञ्चालित जीपलाईनको आवश्यक अध्ययन अवलोकन गरेको  थियो । यता जीपलाईको अप्रेसन तथा ब्रेकिङ्ग सिस्टम बारेमा अध्ययन गरिएको योजना शाखा प्रमुख नरेन्द्रदत्त भट्टले बताए। प्राविधिक टोलीहरु यही सातामा कैलाश आउने र प्रारम्भिक परीक्षण गरिने योजना रहेको प्रमुख भट्टले बताए।जीपलाईन सञ्चालनका लागि आवश्यक कर्मचारीलाई सीप तालिम सहित आवश्यक तयारी गाउँपालिकाले अझै गर्न बाकीँ रहेको जनाइएको छ। कैलाशमा जीपलाईन संचालनमा आएपछि कैलाशमा पर्यटकीय संभावना छ भन्ने कुरालाई पुष्टि गर्नेछ।