सडकमा सेटव्याक कायम नगरी पूर्वाधार नबाउन कैलाश गाउँपालिकाको आग्रह

२६ फागुन, हेटौंडा । मकवानपुरको कैलाश गाउँपालिकाले गाउँपालिका क्षेत्रभित्र रहेका सडक सञ्जाल अन्तरगत सडक क्षेत्राधिकार भित्र सेट व्याक कायम नगरी कुनै पनि घर, टहरा नबाउन गाउँपालिकाले आग्रह गरेको छ । गाउँपालिकाले सुचना जारी गर्दै सेटव्याक कायम नगरी घर टहराजस्ता संरचना निर्माण देखिन आएकाले यस्तो कार्य रोक्न आग्रह गरेको हो । 
गाउँपालिकाको स्वीकृत सडक यातायात गुरु योजना(एमटिएमपी) तथा वस्ती विकास, शहरी योजना तथा भवन निर्माण सम्बन्धी मापदण्ड, २०८० बमोजिम उक्त निर्माण कार्य रोक्न लगाइएको गाउँपालिका अध्यक्ष लोकबहादुर मुक्तानले बताए । मापदण्डमा सडक क्षेत्रबाट दायाँबायाँ ३/३ मिटरको सेट व्याक कायम रहेकोले सोही अनुरुप क्षेत्र छुट्याएर निर्माण कार्य गर्नुपर्ने अध्यक्ष मुक्तानले बताए ।
कैलाशको चुनिया-नामटार-कालिकाटार सडक अन्तरगत भाल्टार, कमलटार, क्रिश्चियन चोक, बेतेघारी घुमाउने, टकुवा, च्याखेटार कालिकाटार हुँदै फास्टार, सुकुभञ्ज्याङ तथा भार्ता लगायत गाउँपालिकाका मुख्य सडक क्षेत्रमा उक्त मापदण्ड लागु हुने प्रमुख प्रशासकीय अधिकृत अमुल श्रेष्ठले बताए । गाउँपालिकाले मापदण्ड तय गरेको छ सोही अनुरुप नागरिकले मापदण्ड पालना गर्नुपर्ने उनको भनाई छ ।