कार्यपालिकाको बैठक वडा अध्यक्षहरुले गरे बहिष्कार

८ असार, हेटौंडा।मकवानपुरको कैलाश गाउँपालिकाको कार्यपालिकाको बैठक वडा अध्यक्षहरुले बहिष्कार गरेका छन् । 

तोकिएको समयमा बैठक नभएको र एजेण्डाको बिषयमा समेत जानकारी नभएको भन्दै सत्तापक्षका वडा अध्यक्षसहित विपक्षी दलका वडा अध्यक्षहरुले बहिष्कार गरेका हुन् । आर्थिक बर्ष २०७६/७७ का लागि वजेट, नीति तथा कार्यक्रमको बिषयमा छलफलका लागि शुक्रबार बिहान १० बजेको लागि बोलाइएको बैठक बेलुका ६ बजेसम्म सुरु नभएको भन्दै वडा अध्यक्षहरुले बहिष्कार गरेका हुन् । ‘आजसम्म तोकिएको समयमा बैठक भएको रेकर्ड छैन’, एक वडा अध्यक्षले भने, ‘बैठकको एजेण्डासम्म पनि थाहा हुँदैन । हाम्रो काम भने गाउँपालिका अध्यक्षले भनेको ठाउँमा सही गर्ने मात्र भएको छ ।’ उनले गाउँपालिका अध्यक्ष टंक मोक्तानले एकलौटी निर्णय गर्ने गरेको आरोप लगाए । शुक्रबार स्थगित भएको बैठक शनिबार बिहानको लागि बोलाइएकोमा शनिबार पनि बस्न नसकेको उनले बताए । यता गाउँपालिका अध्यक्ष टंक मोक्तानले भने कार्यपालिकाको बैठक नभै राजश्व परामर्श समितिको बैठक बस्न लागेको जानकारी दिए । ‘राजश्वको बिषयमा वडा अध्यक्षहरुबाटै केही अपडेट नआएकोले बैठक बस्न नसेकेको मोक्तानले बताए ।