शैक्षिक सत्र सुरुभएसंगै कैलाशमा विद्यालयहरुको अनुगमन

२१ जेठ, हेटौंडा । २०८२ सालको शैक्षिक सत्र  सुरु भएसंगै मकवानपुरको कैलाश गाउँपालिकामा  विद्यालयहरुको अनुगमन सुरु भएको छ ।
यस वर्ष शिक्षकहरुको आन्दोलनले बैशाखको तेस्रो साताबाट सुरु भएको शैक्षिक सत्र सत्र सुरु भए लगत्तै गाउँपालिकाले विद्यालयहरुको अनुगमनलाई तीव्रता दिएको हो । पालिकाका स्रोत शिक्षक धुव्र राज विष्टको नेतृत्वमा अनुगमन सुरु गरिएको जनाइएको छ। यसवर्ष पनि विद्यालयहरुको वास्तविक अवस्थाबारे जानकारी लिन अनुगमनको पाटोलाई तीव्रता दिइएको गाउँ शिक्षा समितिका संयोजक एंव गाउँपालिका अध्यक्ष लोकबहादुर मुक्तानले बताए ।    
यो अघिल्लो शैक्षिक सत्रमा पनि सुरु भएको अभियान हो यस वर्षपनि शैक्षिक सत्र सुरु भइसकेको अवस्थामा विद्यालयमा विद्यार्थी र शिक्षकहरुको उपस्थितीका साथै भर्ना अभियानको अवस्थाबारे जानकारी लिनको लागि अनुगमन गरिएको अध्यक्ष मुक्तानले बताएका छन् ।
भौगोलिक विकटताले गर्दा गाउँमा शिक्षक अभाव थियो । पछिल्लो समय शिक्षा सेवा आयोगबाट नयाँ शिक्षकहरु आउनुभएको छ, विद्यालयमा शिक्षकको उपस्थितले विद्यार्थीहरुमा  उत्साह बढेको अध्यक्ष मुक्तानले बताए ।  
गाउँपालिकाका स्रोत शिक्षक ध्रवराज विष्टले कैलाश ३, ४, ९ र १० वडामा अवस्थित विभिन्न तहका १२ वटा विद्यालयको वस्तुस्थिती अनुगमन गरेका थिए । विद्यालयमा नयाँ शिक्षकहरुको आगमनले गर्दा विद्यार्थीहरुमा छुट्टै खालको उत्साह छाएको स्रोत शिक्षक विष्टले बताए । विद्यार्थी संख्या अति न्यून भएका विद्यालयहरुलाई मर्ज गर्नुपर्ने र विद्यार्थी बढी भएका तथा भौगोलिक रुपमा केन्द्रमा रहेका विद्यालयको कक्षा तह वृद्धि गरिनुपर्ने विष्टले बताए ।
अनुगमनको क्रममा विद्यार्थीहरुको समस्यालाई मध्येनजर गर्दै आवासीय विद्यालयको व्यवस्था गरिनुपर्ने अबको आवश्यकता रहेको देखिन्छ । अन्य वडाको अनुगमनको क्रम जारी रहेकाले  गाउँपालिकामा शिक्षा क्षेत्रको विकासमा लगानी भइरहेको अवस्थामा विषयगत शिक्षक दरबन्दी अभावले पठनपाठनमा झनै समस्या देखिरहेको उनले बताए । 
विद्यालयमा विद्यार्थी भर्ना र नियमित उपस्थितीलाई सुनिश्चित गर्न विद्यालय प्रशासन, व्यवस्थापन समिति र सम्बन्धित वडालाई गाउँ शिक्षा समितिले आग्रह गरेको छ । पछिल्लो समय स्थानीय सरकारले कैलाशको विद्यालय शिक्षाबारे विशेष चासो राख्दै विद्यालयहरुको नियमित रुपमा अनुगमन, त्यहाँ भएका समस्या र समस्याको समाधान गर्दै आइरहेको छ ।